غریب الوطن

وہ ہمارے دفتر کا چوکیدار ہے۔ مانسہرہ سے بھی دور کسی گاؤں سے تعلق ہے۔ مہینے گزرے کہ اپنے علاقے نہیں گیا۔ یہیں اکیلا رہتا ہے۔ پچھلے دنوں چائے کے برتن دھوتے ہوئے کہنے لگا، ایک وقت تھا جب ہم کہتے تھے کہ چائے جلدی دو، ہمیں کالی چائے نہیں چاہیے؛ اور اب خود چائے بناتے ہیں۔ کہتا ہے، ایک بار گھر پر کوئی کپڑا دھونے لگا تو گھر والوں نے ڈانٹا، منع کیا؛ تو میں نے اُن سے کہا کہ یہ تو چھوٹی سی چیز ہے، کراچی میں رہتے ہیں تو سب کام خود ہی اپنے ہاتھوں سے کرتے ہیں۔

کچھ دن پہلے دفتر میں کسی سے منہ ماری ہوگئی۔ میں نے اُسے چپکے چپکے اپنے آنسو صاف کرتے دیکھا۔ ایک عجیب سا احساس ہوا۔ اپنے گھر اور گھر والوں سے دور رہ کر بندہ کتنا کم زور ہوجاتا ہے۔ غریب الوطن صرف وطن سے غریب نہیں ہوتا، ہر چیز سے غریب ہوجاتا ہے۔