طویل غیر حاضری کی مختصر داستان

یوں تو اگر میں اس مختصر داستان کو مختصر ترین بنانا چاہوں تو صرف ایک ہی جملے میں بیان کرسکتا ہوں کہ میری شادی ہوگئی ہے۔ باقی احباب خود سمجھ سکتے ہیں کیوں کہ اُردو بلاگران میں شادی شہدا کی تعداد اب خاصی ہوچکی ہے اور بڑے بڑے سرکردہ (سرپھرے؟) بلاگران شادی شہداؤں کی فہرست میں شامل ہیں؛ البتہ میں شاید اُن میں سب سے کم عمر ہوں گا یا پھر کم سِن شادی شدہ بلاگران میں سے ایک ہوں گا۔

شادی کے بعد پہلے تو میرا وقت ہی میرا وقت نہیں رہا، پھر میرا کمپیوٹر بھی میرے کمرے سے بے دخل ہوگیا، لہٰذا غیر حاضر رہنے کے علاوہ کوئی دوسرا نتیجہ کیسے نکل سکتا  تھا۔ اگر کسی وقت کوئی موضوع ذہن میں آئے تو لکھنے کا موقع نہ ملے اور لکھنے کا موقع ملے تو ذہن کی تختی صفاچٹ۔

شادی کرنے کے علاوہ جو آج کل میں کارہائے نمایاں انجام دے رہا ہوں، اُن میں ایک مقامی انسٹی ٹیوٹ میں کمپیوٹر کورسز (مائیکروسافٹ آفس اور گرافکس ڈیزائننگ) کی تدریس بھی شامل ہے۔ گو کہ مجھے اس انسٹی ٹیوٹ میں پڑھاتے ہوئے کوئی دس ماہ ہونے کو آئے ہیں لیکن ماشاء اللہ اب طلبہ کی تعداد خاصی بڑھ چکی ہے۔

لہٰذا روزمرہ معمول کچھ یوں ہوتا ہے کہ صبح جامعہ، وہاں سے فارغ ہوکر انسٹی ٹیوٹ اور پھر رات میں گھر۔ لہٰذا اگر میں ایک طرف بے حد کارآمد ہوں تو کچھ حد تک ناکارہ بھی ہوگیا ہوں۔ خواہش تو ہے کہ باقاعدگی سے بلاگ کرسکوں، لیکن

ہزاروں خواہشیں ایسی کہ۔۔۔