ج سے جشن، جلوس، جلسہ اور جلن

ہر سال ماہِ ربیع الاوّل کی آمد سے ہی کچھ لوگوں کے پیٹ میں مروڑ اُٹھنا شروع ہوجاتے ہیں، بدعت اور محبت پر بڑی بڑی تقریریں جھاڑی جاتی ہیں، بارہ ولادت یا وفات کی بحث چھیڑی جاتی ہے، اس سال بھی یہی معمول رہا۔ لیکن احباب نے 12 ربیع الاوّل سے قبل اور بعد، اپنے دوغلے پن کا شان دار مظاہرہ کیا۔ 27 جنوری 2012ء کو ’’امامِ انقلاب‘‘ فضل الرحمان نے مزارِ قائد کے پاس ’’اسلام زندہ باد کانفرنس‘‘ منعقد کی جب کہ 12 فروری 2012ء کو دفاعِ پاکستان کونسل نے ’’دفاعِ پاکستان کانفرنس‘‘ کا انعقاد کیا جس میں بہت سی مذہبی و سیاسی جماعتیں شامل تھیں۔ کانفرنس سے دو ہفتے پہلے ہی کراچی شہر میں جگہ جگہ کیمپ لگائے گئے تھے جن پر بلند آواز میں اعلانات اور گیت چلتے رہے۔ اور میلاد النبی صلی اللہ علیہ وسلم کی محافل پر بدعت کا الزام دھرنے والے اپنے کارِ بدعت کے لیے لوگوں کو دعوت دیتے نظر آئے۔ حضور، اب یہ نہ کہیے گا کہ بدعت سے مراد دین میں نئی اختراع نکالنا ہے، دنیاوی اُمور میں نہیں، کیوں کہ آپ تو ’’جدا ہو دیں سیاست سے تو رہ جاتی ہے چنگیزی‘‘ کے اقبالی فلسفے کے پرچاری ہیں، وہ الگ بات ہے کہ آپ کی سیاست سے دین جدا ہوا یا نہیں، لیکن آپ نے اپنے دین میں بھی سیاست کی آمیزش کرلی ہے۔ جلوسوں سے جلنے والے اور عوام کی پریشانی کا سب سے زیادہ درد رکھنے والے اپنی اپنی جماعتوں کے جلوسوں پر چپ سادھے رہتے ہیں، اُنھیں یہ بھی نظر نہیں آتا کہ اُن کی جماعت ہر بار شہر کی مصروف ترین شاہ راہ پر مصروف ترین اوقات ہی میں جلوس اور جلوسیاں نکال کر عوام کو مستقل پریشان کیے رکھتی ہے، اُنھیں یہ بھی دکھائی نہیں دیتا کہ اُن کی مذہبی سیاسی جماعت اپنے ہر جلسے کے لیے شہر میں جگہ جگہ بڑے کیمپ لگاکر لوگوں کے کان پھاڑنے کا ’’مذہبی‘‘ فریضہ بہ خوبی انجام دیتی رہتی ہے، انھیں جلن اُٹھتی ہے تو بس ایسے جلوسوں سے جو رسول اللہ صلی اللہ علیہ وسلم کی آمد کی خوشی میں نکالے جائیں، جلن اُٹھتی ہے تو ایسے نعروں سے جن میں رسولِ اکرم صلی اللہ علیہ وسلم کا ذکر ہو۔ پھر یہ کہتے ہیں کہ کیا رسول اللہ صلی اللہ علیہ وسلم کی زندگی میں ایک بار بھی ایسا ہوا؟ کیا صحابہ کرام رضی اللہ تعالیٰ عنہم کا عشق ہم سے زیادہ نہیں تھا؟ لیکن یہ نہیں بتاتے کہ کیا ہمارے ملک عزیز پاکستان کی اہمیت مدینۃ النبی صلی اللہ علیہ وسلم سے بڑھ کر ہے؟ کیا صحابہ نے مدینے کی حفاظت کے لیے ایسے جلسے جلوس نکالے؟
یہ احباب اپنے مدارس کے سالانہ جلسۂ دستارِ فضیلت اور دیگر جلسوں کے انعقاد پر بھی چپ سادھے بیٹھے رہتے ہیں۔ کیا ان کے مدارس سے فارغ ہونے والے طلبہ صحابہ کرام سے زیادہ علم حاصل کرلیتے ہیں جو اُن کے لیے ایسے جلسوں کا انعقاد کیا جاتا ہے؟ یہ صاحبان اپنی مساجد، مدارس، دارالعلوم کے یومِ تاسیس پر بھی محافل کا انعقاد کرتے ہیں، کیا رسولِ اکرم صلی اللہ علیہ وسلم یا صحابہ کرام رضی اللہ عنہم کے دور میں ایسی کوئی مثال ملتی ہے؟ 1980ء میں دارالعلوم دیوبند کا صد سالہ جشن منایا گیا جس میں مہمانِ خصوصی کی حیثیت سے اندرا گاندھی نے شرکت کی جنھیں منبر پر بھی بٹھایا گیا، کیا دورِ نبوت و خلافت میں ایسی کوئی مثال ملتی ہے کہ کسی مسجد یا دارالعلوم کے ایک سال یا چند سال مکمل ہونے پر ایسی تقریبات کا انعقاد کیا گیا ہو؟ کیا مسجدِ نبوی صلی اللہ علیہ وسلم کی تعمیر کا ایک سال گزرنے کے بعد کوئی خصوصی محفل کا انعقاد کیا گیا تھا؟ تو پھر جناب کی آنکھیں اپنے بزرگوں اور جماعت کی طرف سے کیوں بند ہیں؟

آخر میں جماعتِ اہلِ حدیث کے ہفت روزہ رسالے سے مختصراً اقتباس پیش کرتا چلوں، جو مجھے ایک مضمون سے ملے۔ ہفت روزہ ’’اہلِ حدیث‘‘ لاہور 27 مارچ 1981ء کی اشاعت میں لکھتا ہے:

’’ملک میں حقیقی اسلامی تقریبات کی طرح یہ بھی (عید میلاد النبی صلی اللہ علیہ وسلم ) ایک اسلامی تقریب ہی شمارہوتی ہے اور اس امر واقعہ سے آپ بھی انکار نہیں کرسکتے کہ اب ہر برس ہی 12 ربیع الاول کو اس تقریب کے اجلال و احترام میں سرکاری طور پر ملک بھر میں تعطیل عام ہوتی ہے اور آپ اگر سرکاری ملازم ہیں تو اپنے منہ سے اس کو ہزار بار بدعت کہنے کے باوجود آ پ بھی یہ چھٹی مناتے ہیں اور آئندہ بھی یہ جب تک یہاں چلتی ہے آپ اپنی تمام تر (اہلحدیثیت ) کے باوجود یہ چھٹی مناتے رہیں گے ۔۔۔۔ خواہ کوئی ہزار منہ بنائے دس ہزار بار ناراض ہوکر بگڑے جب تک خدا تعالیٰ کو منظور ہوا یہاں اس تقریب کی کارفرمائی ایک امر واقعہ ہی ہے ۔۔۔۔
۔۔۔ حکومت اگر اپنے زیراہتمام تقریب کو سادہ رکھے اور دوسروں کو بھی اس بات کی پرزور تلقین کرے تو اس کااثر یقینا خاطرخواہ ہوگا ۔ انشاءاللہ ۔ اس تقریب کے ضمن میں جتنے بھی جلوس نکلتے ہیں اگر ان کو حکومت کے اہتمام سے خاص کردیا جائے تو یہ کام ہرگز مشکل نہیں ہے ، ہر جگہ کے حکام بآسانی اس کام کو سرانجام دے سکتے ہیں ، اگر ہر شہر میں صرف ایک ہی جلوس نکلے اور اسے ہر ہر جگہ کے سرکاری حکام کنٹرول کریں تو کوئی وجہ نہیں کہ مفاسد اچھل سکیں اور مصائب رونما ہوں ۔۔۔۔
۔۔۔ اگر عید کے نام پر ہی آپ کا یوم ولادت منانا ہے تو رحمۃ اللعالمین صلی اللہ علیہ وسلم کی ذات گرامی کی طرف دیکھیں کہ آپ نے یہ دن کیسے منایا تھا ؟ سنئے ! رسول اللہ صلی اللہ علیہ وسلم نے یہ دن منایا پر اتنی ترمیم کے ساتھ کہ اسے تنہا عید میلاد نہیں رہنے دیا بلکہ عید میلاد اور عید بعث کہہ کر منایا اور منایا بھی روزہ رکھ کر اور سال بہ سال نہیں بلکہ ہر ہفتہ منایا ۔ ‘‘

اور جن صاحبان کو لفظ ’’عید‘‘ کے استعمال پر اعتراض ہے، اُن کے لیے عرض یہ ہے کہ عیدِ شرعی اور عیدِ مسرت میں بہت فرق ہے اور عیدِ میلاد کو کوئی بھی عیدِ شرعی نہیں کہتا اس لیے اس کی نماز اور خطبے کا سوال باطل ہوجاتا ہے۔ اور اگر آپ کو صرف لفظ ’’عید‘‘ ہی پر اعتراض ہو تو عید نہ سمجھ کر خوشی منالیں۔ ویسے جماعتِ اہلِ حدیث کے ترجمان ہفت روزہ ’’تنظیمِ اہلِ حدیث‘‘ لاہور نے 17 مئی 1963ء کی اشاعت میں لکھا ہے:

’’مومن کی پانچ عیدیں ہیں ، جس دن گناہ سے محفوظ رہے ، جس دن خاتمہ بالخیر ہو ، جس دن پل سے سلامتی کے ساتھ گزرے ، جس دن جنت میں داخل ہو اور جب پردردگار کے دیدار سے بہر ہ یاب ہو۔‘‘

وضاحت: اگر آپ میرے بلاگ کے پُرانے قاری ہیں تو آپ سمجھ سکتے ہیں کہ یہ تحریر ’’نہ یہ طرز مِری نہ یہ رنگ مرا، ناچار اس راہ پڑا جانا‘‘ کی صورت ہے۔ میں عموماً ایسے موضوعات پر تحاریر لکھنے سے گریز کرتا ہوں لیکن اس بار اردو بلاگستان میں ایسی کئی تحاریر پڑھنے کے بعد میں نے یہ تحریر لکھی۔ اس کامقصد اردو بلاگنگ میں نئی بحث، جھگڑے اور گروہ بندی کا آغاز کرنا نہیں ہے جیسا کہ پچھلے سالوں میں مختلف وجوہات کی بِنا پر ہوتا رہا۔ باقی مجھ سے میری رائے پوچھیں تو میں جلوسوں کا مخالف ہوں چاہے وہ کسی بھی موقع اور کسی بھی نوعیت کے ہوں، اور وجہ صرف عوام کو پہنچنے والی تکلیف۔ اس لیے میں مذہبی یا سیاسی، کسی بھی جلوس میں شرکت نہیں کرتا۔ اور جشنِ میلاد النبی صلی اللہ علیہ وسلم کے حوالے سے بھی میں یہی کہتا ہوں کہ جشن کے کسی انداز پر مناسب پیرائے میں اعتراض کیا جاسکتا ہے لیکن جشن پر اعتراض بے بنیاد ہے۔