مظلوم عورت۔ ظالم مرد

آج کل ہمارے ہاں ڈراموں میں ایک نکتے پر ڈراما نگاروں کی اکثریت کا بہت زور ہے۔ اور وہ نکتہ یہ ہے کہ عورت مظلوم ہے، عورت بے گناہ ہے، عورت معصوم ہے۔ اس نکتے کو ہر ڈرامے میں گھما پھرا کر، خوب رنگ بھر کر اجاگر کیا جاتا ہے۔ عورت اگر چوری چھپے کسی سے مل رہی ہے، ملاقاتیں کررہی ہے، یا کچھ بھی غلط تو اُسے پہلے مرد سے بے عزت کرواکر اُس کے بعد یہ ظاہر کیا جاتا ہے کہ وہ جس سے مل رہی تھی وہ کوئی پرانا عزیز تھا، کوئی رشتے دار تھا، یا کوئی بھی ایسی کہانی جس سے وہ مظلوم ثابت ہوجاتی ہے اور مرد انتہائی شکی اور ذلیل ٹھہرتا ہے۔ جب کہ مرد اگر کسی سے ملتا ہوا دکھایا جائے تو وہ یقیناً اُس کی محبوبہ یا گرل فرینڈ ہوتی ہے جس سے وہ فلرٹ کررہا ہے یا اپنی بیوی کو دھوکا دے رہا ہے یا اپنے بچوں کے ساتھ غلط کررہا ہے۔ پھر آخر میں اُس کا کچا چٹھا کھولا جاتا ہے، لڑکی کے ہاتھوں ذلیل کروایا جاتا ہے اور گال پر تھپڑ پڑواکر ایک مکالمہ ادا کیا جاتا ہے کہ ’’مرد تو ہوتے ہی ایسے ہیں۔‘‘ یہ مکالمہ بھی مختلف مناظر اور مختلف انداز سے ہر ڈراما نگار پیش کرتا ہے۔

ہمارے گھروں میں یہ ڈرامے بہت شوق اور رغبت سے دیکھے جاتے ہیں اور ہم یہ سوچ کر خود کو تسلی دیتے ہیں کہ صرف ڈرامے ہی تو ہیں لیکن یہی کہانیاں آہستہ آہستہ حقیقی زندگیوں میں شامل ہونے لگتی ہیں۔ بہن اپنے بھائی کے لیے، بیوی اپنے شوہر کے لیے ڈراموں سے سیکھے ہوئے جذباتی جملے بلیک میلنگ یا طعنہ دینے کے لیے استعمال کرنے لگتی ہے اور ہر لڑکی کسی بھی لڑکے سے مایوس ہونے پر ’’مرد تو ہوتے ہی ایسے ہیں‘‘ کا طعنہ دیتے ہوئے یہ بھول جاتی ہے کہ وہ بھی مرد ہی تھا جو اُس کے دنیا میں آنے کا سبب بنا، وہ بھی مرد ہی تھا جو اُس لڑکی کی ماں کو محبت دیتا رہا، وہ بھی مرد ہی تھا جو اُس کو شفقت اور لاڈ پیار سے پالتا رہا، اور یوں ایک مکالمے میں سارے مرد مردود ٹھہرتے ہیں۔