رویے

’’ارے ارے۔۔۔ یہ کیا کررہے ہو؟‘‘

’’اونہہ ہوں۔۔۔ تم نے پھر وہی کردیا؟‘‘

’’اففف بے وقوف، تمھیں کتنی بار ایسا کرنے سے منع کیا ہے۔‘‘

’’یہ تم چل کیسے رہے ہو؟‘‘

’’جاہل، تمھیں کھانا کھانے کی تمیز نہیں ہے؟‘‘

’’تم وہاں اتنی دیر کیوں لگارہے ہو؟‘‘

’’پاگل ہوگئے ہو؟‘‘

یہ اور ایسے بہت سے جملے ہیں جو بڑے عموماً چھوٹوں کو ٹوکتے ہوئے استعمال کرتے ہیں۔ اکثر ایسا ہوتا ہے کہ بڑوں کا ٹوکنا صحیح ہوتا ہے، وہ درست راہ نمائی کررہے ہوتے ہیں؛ لیکن، اپنے سے بڑوں کا ایسا انداز بچوں کی شخصیت میں بہت سے چھید کرجاتا ہے، ان کی خود اعتمادی کو چھلنی چھلنی کردیتا ہے۔ بچہ اُس کام کو کرتے وقت گھبراہٹ کا شکار ہوجاتا ہے، اور یوں وہ ایسا کام ٹھیک طرح سے انجام نہیں دے پاتا جس پر اُسے بار بار ٹوکا جاتا ہو یا اُس میں سب کے سامنے خامیاں نکالی جاتی ہوں۔ آپ اُسے تنہائی میں لہجہ نرم رکھتے ہوئے سمجھا سکتے ہیں، آپ وہ کام خود ٹھیک طرح سے کرکے بتاسکتے ہیں؛ مگر، عام طور سے ہم اتنی بھی زحمت نہیں کرتے کہ اُس کام کو ٹھیک سے کرنے کا طریقہ بتادیں یا جہاں غلطی ہو، اُسے درست کرنے کی نشان دہی کردیں۔

ہم اپنی فکروں اور پریشانیوں کا اظہار دوسروں پر برس کر کرنے کے عادی ہیں۔ ہم اُن چھوٹے چھوٹے کاموں پر بھی مشتعل ہوکر چلانے لگتے ہیں، جنھیں ہم خود سب کی آنکھوں سے بچ کر کرنے سے گریز نہیں کرتے۔ یہ حقیقت ہے کہ موجودہ حالات میں بہت سی اُلجھنیں ہمیں گھیرے رکھتی ہیں؛ لیکن، یہ ہمیں ایسے رویوں کا جواز قطعاً فراہم نہیں کرتیں۔ یہ مسئلہ یوں بھی بڑھتا جارہا ہے کہ ہم نے مطالعہ کرنا اور سوچنا/ غور و فکر کرنا چھوڑ دیا ہے۔ مطالعہ چاہے کسی بھی کتاب کا ہو (بس اخلاق سے گری نہ ہو)، وہ فائدہ دیتا ہے۔ پھر وہ چاہے کوئی معلوماتی کتاب ہو یا کہانی، ناول اور افسانہ ہو یا شاعری، نصابی کتاب ہو یا غیر نصابی، مطالعہ سوچ کا دائرہ وسیع کرتا ہے، شعور و آگہی دیتا ہے؛ جب کہ، آج ہمارے پاس اس کام کے لیے وقت نہیں۔ اور دوسری وجہ ہے، سوچنا۔ ہم سوچتے تو ہیں لیکن ہماری سوچ کا محور بیشتر اوقات ہماری اپنی ذات اور ہمارا اپنا نفع نقصان کا حساب کتاب ہوتا ہے۔ ہم اپنی سوچ کو خود احتسابی کی طرف لے کر نہیں جاتے۔ ہم ذرا سی دیر یہ نہیں سوچتے کہ ہم فلاں وقت فلاں شخص کے ساتھ اس طرح پیش آئے تھے، اگر ہم اُس کی جگہ ہوتے اور کوئی ہم سے اس طرح پیش آتا تو ہمیں کتنی تکلیف ہوتی۔ حسنِ اتفاق سے اگر ہمیں کبھی ایسا کوئی خیال آ بھی جائے تو ہم اپنی غلطی تسلیم کرنے کے بجائے خود کو مطمئن کرنے کے لیے اُس رویے کا جواز گھڑنے کی کوشش کرتے ہیں۔ یوں، ہمارے معاشرے میں اشتعال، عدم برداشت، لڑائی جھگڑا، گالم گلوچ اور ہاتھا پائی کے نمونے جا بہ جا دیکھنے کو ملتے ہیں۔

کیا کسی انسان میں کتب بینی اور مطالعے کا شوق زبردستی بیدار کیا جاسکتا ہے؟ :(