مہنگی گاڑی کا سفر

کراچی (یا شاید پورے پاکستان ہی کی) پبلک ٹرانسپورٹ میں سفر کرنا بھی کمال ہے۔ بس میں ایسے کھڑے جیسے ٹرک میں بھیڑ بکریاں لدی ہوئی ہوں، دروازے پر لٹکی اور چھتوں پر سوار عوام۔۔۔ یہ سب کسی تماشے سے کم نہیں ہوتا۔ کسی کو ایک طرف سے دھکا پڑتا ہے اور وہ آگے ہوتا ہے تو بیٹھے ہوئے صاحب سے ٹکرا جاتا ہے جو اسے گھور کر دیکھتے ہیں۔۔۔ کبھی موصوف ڈرائیور گاڑی بھگاتے بھگاتے ایسا بریک لگاتے ہیں کہ سوتے ہوئے لوگ جاگ جاتے ہیں اور اچھے خاصے حضرات لڑھک جاتے ہیں۔ اورکبھی گاڑی کی سست رفتاری بندے کو یہ سوچنے پر مجبور کردیتی ہے کہ اگر وہ اس بس کے بجائے گدھا گاڑی پر سوار ہوتا تو شاید جلدی پہنچ جاتا۔۔۔ :)

بس کے سفر میں اکثر بدتمیزی اور بداخلاقی کے نمونے تو دیکھنے کو ملتے ہی ہیں، کبھی اعلیٰ اخلاق کی مثالیں بھی سامنے آتی ہیں جب کوئی نوجوان کسی بزرگ کو دیکھ کر اپنا آرام قربان کردیتا ہے اور بیٹھنے کی جگہ اُن کے حوالے کرکے خود کھڑا ہوجاتا ہے۔ لیکن کچھ افراد دو نمبری بھی کرجاتے ہیں۔ ندیم صاحب میرے ساتھ دفتر میں کام کرتے ہیں۔ کہنے لگے، مجھے ایسے لوگوں پر بڑا غصہ آتا ہے کہ جب تک خود بیٹھے تھے تو بیٹھے رہے اور جب خود کے اُترنے کا وقت آیا تو کسی بزرگ کو دور سے اشارہ کرکے اُن کو بلایا اور اپنی جگہ بٹھاکر اتر گئے۔ بھئی تمہیں اگر بزرگ کا اتنا ہی خیال تھا تو پہلے قربانی دینی تھی نا۔ اب تو سیٹ پر اس بندے کا حق تھا جو وہاں کھڑا ہوا تھا، تم نے کس اختیار سے اس کا حق چھین کر دوسرے پر احسان کرنے کی کوشش کی۔ :devil: بات ویسے ٹھیک ہے ندیم صاحب کی، مجھے بھی بہت غصہ آتا ہے :wink: حالانکہ بزرگوں کو دیکھ کر میں بھی کبھی اپنی جگہ خالی کردیتا ہوں۔

دوسری طرف، اگر بس ڈرائیور کا موڈ نہیں ہے تو آپ اس کو لاکھ کہتے رہیں، شور مچاتے رہیں، گاڑی پیٹتے رہیں، گالیاں دیتے رہیں، مجال ہے جو اس کے کان پر جوں رینگے۔ لیکن اگر پیچھے سے اس کے مقابلے پر کوئی گاڑی آگئی تو پھر اترنے والے مسافروں کی خیر نہیں۔ گاڑی وہ رفتار پکڑتی ہے کہ جن کی منزل آجاتی ہے، وہ شور مچاتے رہتے ہیں اور گاڑی پوری رفتار سے جھومتی جھامتی رواں دواں۔

اس سب کے باوجود ہمارے ہاں جب کوئی پوچھتا ہے کہ کیسے آئے ہو؟ بائیک پر یا کار میں؟ تو جواب ملتا ہے کہ نہیں بھئی، میں یہ چھوٹی چھوٹی غریبوں والی گاڑیاں استعمال نہیں کرتا، مہنگی والی گاڑی میں آیا ہوں :P