جامعہ نامہ. دنگا فساد

آج سیاسیات (Political Science) کی کلاس لے کر نکلا تو فوراً ہی مرکزِ مطالعاتِ ایران شناسی کی طرف بھاگا کیوں کہ بارہ بجے فارسی کی کلاس شروع ہوجاتی ہے اور میں ہمیشہ دس، پندرہ منٹ تاخیر ہی سے پہنچتا ہوں۔ فارسی کا سبق لیتے ابھی آدھ گھنٹا ہی گزرا ہوگا کہ مرکز کے ملازم شیخ صاحب آکر میڈم (ڈاکٹر ریحانہ افسر، ڈائریکٹر مرکزِ مطالعاتِ ایران شناسی، جامعہ کراچی) سے کہنے لگے کہ حالات کچھ ٹھیک نہیں ہیں، کلاس ختم کردیں۔ میڈم نے سرسری انداز میں بات ٹال دی۔ میں نے باہر جھانکا تو دوسری کلاسز جاری نظر آئیں۔ میں نے بھی اُن کو تسلی دے دی۔ شیخ صاحب تھوڑی دیر بعد دوبارہ آکر اصرار کرنے لگے کہ کلاس ملتوی کردیں۔ میڈم نے انہیں کہا کہ آپ زیادہ پریشان نہ ہوں، دفتر کا دروازہ بند کردیں۔ پھر کمرہ سے باہر مجھے کچھ بڑی عمر کے لڑکے دکھائی دینے لگے تو کچھ خطرہ محسوس ہوا۔ میں فوراً اُٹھ کر باہر نکلا اور ان سے پوچھا کہ سب خیر ہے نا؟ انہوں نے غیر مطمئن لہجے میں کہا کہ ہاں اور میں دوبارہ سے لیکچر لینے لگا۔

کچھ ہی ثانیے گزرے تھے کہ اچانک بھاگم دوڑی مچ اُٹھی۔ طلبا اِدھر سے اُدھر بھاگ رہے تھے۔ تب ہمیں احساس ہوا کہ خطرہ سر پر آن کھڑا ہوا ہے۔ سبق وہیں روک دیا گیا اور سارے بچتے بچاتے بھاگے۔ یہ پہلی بار تھا کہ جامعہ میں میری موجودگی کے بیچ ایسا ہنگامہ کھڑا ہوا ہو لہٰذا میں نے سوچا کہ بھاگنے سے پہلے ذرا منظرنامہ دیکھ لوں (یہاں منظرنامے سے مراد یہ والا منظرنامہ نہیں)۔ مجھے اس وقت وہ نصائح یاد آئے جو ہمیں بچپن سے کیے جاتے ہیں کہ ایسی کسی بھی حالت میں فوراً اس جگہ سے ہٹ جاؤ۔ میں نے سوچا، ہٹ جاؤں گا، ایسی بھی کیا جلدی ہے۔ راہ داری میں فسادی گروہوں کی آنکھ مچولی جاری تھی۔ پہلے ایک دیوار سے کوئی باہر جھانکتا اور پتھر کھینچ کر مارتا۔ اس کے بعد دوسری طرف سے ایک لڑکا کمرۂ جماعت سے باہر نکل کر کرسی مخالف کی طرف پھینکتا۔ جلد ہی میں اس یکسانیت سے بور ہوگیا لہٰذا فیصلہ کیا کہ اب چلنا چاہیے۔

راستے میں جابجا ایسے مناظر دیکھنے کو ملے۔ جہاں کچھ طلبا بھاگ نکلنا چاہ رہے تھے وہیں کچھ لڑکے، لڑکیاں بڑے مزے سے کھڑے ہوئے موبائل سے اس ساری صورتِ حال کی ویڈیو بنارہے تھے۔ شعبۂ سیاسیات پہنچا تو سر کامران خان (استاد، سیاسیات، جامعہ کراچی) نظر آگئے۔ پوچھنے لگے کہ کیا جارہے ہو؟ میں نے کہا کہ جی ہاں۔ کہنے لگے کہ چلو، پھر میں بھی ساتھ چلتا ہوں۔ مجھے اور کیا چاہیے تھا۔ اگرچہ سفر ہم نے بس ہی میں کرنا تھا لیکن اُن کے ساتھ سیاسی موضوعات پر گفتگو کرتے ہوئے سفر اچھا گزر جاتا ہے اور کافی کچھ سیکھنے کو بھی ملتا ہے۔

خیر، میں تو دفتر آگیا۔ بعد میں پتا چلا کہ وہ لڑائی جو جمعیت (اسلامی جمعیت طلبہ) اور آئی ایس او (امامیہ اسٹوڈنٹس آرگنائزیشن) کے درمیان شروع ہوئی تھی، بعد از آں اس میں پی ایس ایف (پیپلز اسٹٹوڈنٹس فیڈریشن) بھی آئی ایس او کی حمایت میں کود پڑی، ایڈمن بلڈنگ میں بھی کافی توڑ پھوڑ مچائی۔ میرا ایک ہم جماعت آئی ایس او میں ہے، سنا ہے کہ وہ بھی تھوڑا زخمی ہوا تھا۔ اس جھگڑے کی وجہ تو اللہ ہی جانے، کیا ہے۔ پرسوں شام بھی جمعیت اور آئی ایس او میں ہنگاما آرائی ہوئی تھی۔ سنا ہے کہ جامعہ پنجاب میں جمعیت کی کچھ پٹائی ہوئی ہے تو جمعیت کا احتجاج جاری تھا۔ اللہ جانے پرسوں کا جھگڑا اسی احتجاج کے دوران شروع ہوا یا کوئی اور وجہ تھی۔ لیکن بہ ہر حال، ہمارے ہاں کے بڑے تعلیمی اداروں میں یہ کوئی انوکھی بات نہیں۔ ایسے واقعات آئے روز ہوتے ہی رہتے ہیں۔ افسوس! طلبا تنظیموں کا مقصد یہ تو نہ تھا۔