Laaton Ke Bhoot

مبارک ہو۔۔۔ تمام ججوں کو بحال کردیا گیا۔ رات گئے وزیر اعظم پاکستان یوسف رضا گیلانی نے تمام ججوں کی بحالی کا اعلان کیا، ساتھ ہی دفعہ 144 کے خاتمے اور تمام گرفتار سیاسی کارکنان و وکلاء کی رہائی کا بھی اعلان کیا گیا۔ میری طرف سے آپ سب کو اس خوش خبری پر بہت بہت بہت مبارک باد۔

دو دن پہلے تک صرف میرا ہی نہیں، بلکہ میں نے جس جس سے اس موضوع پر بات کی، اکثریت کا خیال تھا کہ کچھ بھی ہوجائے، جسٹس افتخار چودھری بحال نہیں ہونے والے۔ لیکن کل صبح جب احتجاجی قافلے روانہ ہوئے تو ایسا لگتا تھا کہ آر یا پار والا مقام آگیا ہے۔ نواز شریف اور اعتزاز احسن کا نظربندی کے احکامات نہ مانتے ہوئے تمام رکاوٹیں خاطر میں نہ لا کر باہر آجانا وہ مرحلہ تھا جب لانگ مارچ کی کامیابی کا سفر شروع ہوا اور شام تک ایسا لگ رہا تھا کہ اب حکومت کے پاس دو ہی راستے بچے ہیں۔ ذلیل ہوجائے یا عزت کا سامان کرلے۔۔۔ دوسرا راستہ منتخب کرلیا گیا۔

اتنا ہنگامہ ہوا، مسائل کھڑے کیے گئے، سب سے بڑھ کر دلوں میں کدورتیں بڑھیں، فاصلے بڑھے، اس کے بعد "میں نہ مانوں" کی رٹ لگاکر اقدار کی کرسی پر بیٹھے ہوئے جب عوام کے ہجوم کو دیکھ کر بوکھلائے تو راستے پر آئے، یعنی لاتوں کے بھوت باتوں سے تو مانتے ہی نہیں ہیں نا۔۔۔

جو کچھ بھی ہوا، اس کے بارے میں تفصیل سے بہت لوگ لکھیں گے۔۔۔ میری یہ مختصر سی پوسٹ ہی کافی ہے۔ ;) اور۔۔۔۔ باقی کچھ ہو نہ ہو، مجھے خوشی ہے کہ صدرِ مملکت آصف علی زرداری نے میرے ووٹ کی لاج رکھ لی ہے۔ :P