اسپاٹ فکسنگ اسکینڈل

ہر آنے والا دن الجھنوں اور پریشانیوں کا نیا باب کھولتا چلا جارہا ہے۔ پاکستان اور انگلینڈ کے مابین سیریز کے آخری ٹیسٹ میچ کے بعد آنے والے اسپاٹ فکسنگ اسکینڈل نے ایک تہلکہ مچا رکھا ہے۔ اس حوالے سے بہت کچھ لکھا جاچکا ہے، لکھا جارہا ہے اور مستقبل میں بھی لکھا جاتا ہی رہے گا۔ میں نے اب تک کے مشاہدے اور تجزیوں کے مطالعے کے بعد جو نکات اکٹھے کیے ہیں، انہیں ایک جگہ جمع کررہا ہوں۔

پاکستانی کھلاڑیوں کے خلاف شکوک و شبہات جنم دینے والی باتیں:

٭ پاکستانی کھلاڑیوں کے اظہر مجید اور مظہر مجید سے رابطے تھے۔

٭ کھلاڑیوں کو مجید برادرز سے دور رہنے کا کہا گیا لیکن انہوں نے یہ ہدایات نظر انداز کردیں۔ اسکینڈل سامنے آنے سے ایک مہینہ پہلے یعنی 27 جولائی 2010ء کو روزنامہ ’’جنگ‘‘ کے نمائندے عبد الماجد بھٹی نے اپنی رپورٹ میں اس بات کا ذکر کرکے خدشات کا اظہار کیا۔ یہ رپورٹ 27 جولائی کو شائع ہوئی ہے جب کہ برطانوی میڈیا میں ایسا کوئی اسکینڈل گردش نہیں کررہا تھا۔ (بہ حوالہ روزنامہ ’’جنگ‘‘، 27 جولائی 2010ء)

٭ شاہد خان آفریدی نے انگلینڈ کے خلاف پہلے ٹیسٹ میچ میں شکست کے فوراً بعد استعفا دے دیا تھا۔ اُس وقت شاہد آفریدی کے فیصلے کو اُن کی جذباتیت اور جلد بازی ٹھہرایا گیا۔ تاہم اب سامنے آنے والی خبریں ظاہر کرتی ہیں کہ آفریدی نے انتظامیہ سے کہا تھا کہ کھلاڑیوں کی مشکوک افراد سے ملاقاتوں کے حوالے سے سختی کی جائے لیکن کھلاڑی جب باز نہیں آئے تو پہلے ٹیسٹ میچ کے بعد آفریدی نے اسی میں عافیت سمجھی کہ وہ عزت کے ساتھ وطن رخصت ہوجائیں۔ (بہ حوالہ روزنامہ ’’ایکسپریس‘‘، 30اگست 2010ء)

٭ ایک سینئر کھلاڑی نے انتظامیہ کو کامران اکمل اور سلمان بٹ کو موصول ہونے والے ایک مشکوک ایس۔ایم۔ایس سے آگاہ کیا جس میں یہ تفصیل درج تھی کہ کون سا اوور میڈن کھیلنا ہے اور کس اوور میں کتنا اسکور کرنا ہے۔

٭ محمد عامر اور محمد آصف کی دونوں نو بالز پر کمنٹریٹرز کا تبصرہ غیر معمولی ہے۔ (ویڈیو دیکھیں)

پاکستانی کھلاڑیوں کے حق میں جانے والی باتیں:

٭ نیوز آف دی ورلڈ کی جانب سے بنائی جانے والی کسی ویڈیو سے تاریخ اور وقت ظاہر نہیں ہوتا۔

٭ مظہر مجید سے رپورٹر کی وہ ملاقات جو گاڑی میں ہوئی اور مظہر کو دس ہزار پاؤنڈ دیے گئے، اس کی ویڈیو بنانے میں تین خفیہ کیمروں کی مدد لی گئی ہے۔ کیا یہ کام اتنی صفائی سے ممکن تھا؟ (ویڈیو دیکھیں)

٭ کار میں ہونے والی ملاقات کی ویڈیو میں مظہر کی اداکاری انتہائی تھرڈ کلاس ہے۔ وہ کیمرے کی طرف نظر کرتا ہے، کبھی جملہ ادھورا چھوڑ دیتا ہے تو کبھی دو بار ادا کرتا ہے۔

٭ اس ویڈیو میں مظہر کی شرٹ کا رنگ آسمانی نیلا دکھائی دیتا ہے جب کہ جب وہ کار سے نکل کر وہاب ریاض اور عمر امین سے ملاقات کرتا ہے تو جیکٹ اتارنے پر اس کی شرٹ کا رنگ سیاہ ہوتا ہے۔

٭ مظہر وہاب ریاض اور عمر امین کو اپنی جیکٹ کھول کر دکھارہا ہے جس میں دس ہزار پاؤنڈ کی رقم رکھی ہوئی ہے۔ آس پاس خاصی عوام ہے، کیا اس ہجوم میں ایسی حرکت مناسب لگتی ہے؟

٭ مظہر کے چوں کہ پاکستانی کرکٹرز سے کافی روابط تھے اس لیے ان میں سے کسی کو شرٹ دینے سے کوئی خاص بات ثابت نہیں کی جاسکتی جب کہ ویڈیو سے یہ بھی پتا نہیں چل رہا ہے کہ کار میں گفتگو کے مناظر اور وہاب ریاض کو جیکٹ دینے کے مناظر میں تسلسل ہے۔

٭ ایک ’’فکسر‘‘ کا اتنی جلدی کسی پر اعتماد کرلینا اور یوں ’’بالمشافہ سودے‘‘ کرتے پھرنا خاصا معنی خیز ہے۔

٭ جس ویڈیو میں مظہر نے رپورٹر سے ڈیڑھ لاکھ پاؤنڈ لیے، وہاں کیمرے کا بالکل مظہر مجید پر فوکس ہونا شکوک و شبہات کو جنم لیتا ہے۔ (ویڈیو دیکھیں)

٭ مظہر جس طرح اتنی بڑی رقم وصول کرتا ہے اور کیمرے کے سامنے میز پر سجاتا ہے پھر ایک گڈی گنتا ہے، اس پر بھی کئی سوالات جنم لیتے ہیں۔

٭ کیا نو بالز پر بھی سٹہ کھیلا جاتا ہے؟ یہ بھی ایک بڑا سوال ہے۔

٭ کہا جارہا ہے کہ محمد عامر جب نو بال کرارہے تھے تو کپتان سلمان بٹ بیٹسمین کی طرف دیکھنے کے بجائے محمد عامر کو دیکھ رہے تھے کہ کیا وہ نوبال کروائے گا؟ (تصویر) یہ ایک احمقانہ اعتراض ہے۔ اکثر ایسا بھی ہوتا ہے کہ جب بالر گیند کرانے کے لیے بھاگتا ہے تو اسے دیکھا جارہا ہوتا ہے اور جیسے ہی وہ گیند پھینکتا ہے تو توجہ بیٹسمین کی طرف مبذول ہوجاتی ہے۔

٭ وہ تصویر جس میں سلمان بٹ، مظہر مجید اور رپورٹر دکھائی دیتے ہیں، اس پر بہت سے شکوک و شبہات پائے جاتے ہیں۔ اگر سلمان بٹ اس تصویر کھنچواتے وقت موجود تھے تو وہ ان دونوں کے آگے آکر کیوں کھڑے ہوئے؟ دونوں کے درمیان میں کیوں نہیں؟ سلمان بٹ کے بائیں ہاتھ پر جیکٹ بالکل سیدھی ہے اور دائیں جانب قدرے ناہموار۔ سلمان بٹ کے چہرے پر باقی دونوں افراد کے مقابلے میں زیادہ روشنی پڑتی نظر آتی ہے۔ مظہر کے بائیں ہاتھ کے سامنے کوئی چیز پڑی ہے جو شاید کرسی ہے۔ کیا فوٹوگرافر اتنا بے وقوف تھا؟ (تصویر دیکھیں)

ابھی بہت سی باتیں سامنے آنا باقی ہیں لیکن مجھے امید ہے کہ اگر کیس صحیح طرح لڑا جائے تو ہم ان لڑکوں کو بچاسکیں گے۔ لیکن دو قسم کے لوگوں کو جوتے پڑنا ضروری ہیں۔ ایک وہ جن کے سر غیر ثابت شدہ الزامات پر ہی جھک گئے اور ایک وہ جو اس میں پنجابی تعصب ڈھونڈ رہے ہیں، اُلو کے پٹھے!

مزید تحاریر:

میچ فکسنگ اسکینڈل (نیوز آف دی ورلڈ سے)۔ مظہر محمود

تین نو بالز کی کہانی (نیوز آف دی ورلڈ سے)۔ مظہر محمود

فکسر دس ہزار پاؤنڈز وصول کرتا ہے (نیوز آف دی ورلڈ سے)۔ مظہر محمود

تین پاکستانی کھلاڑی ٹور سے باہر (نیوز آف دی ورلڈ سے)۔

شواہد ناکافی ثابت ہوسکتے ہیں (بی بی سی اردو سے)

پاک کا ناپاک کھیل (بی بی سی اردو سے) ہندو ذہنیت کا کمینہ پن

اسپوٹ فکسنگ اسکینڈل (بلا عنوان سے) اسد