ہم ہیں نئے، انداز کیوں ہو پرانا

میں ابھی نمازِ جمعہ سے واپس آرہا تھا تو دیکھا کہ چار، پانچ لڑکے ایک طرف بیٹھے تھے جن کی عمریں پندرہ سال سے کم ہی تھیں۔ سب وقفے وقفے سے ایک ہی آواز بلند کرتے: ’’آئے ہائے جوانی!‘‘ پہلے تو میں نے خیال کیا کہ یوں ہی شرارتوں میں لگے ہیں لیکن غور کرنے پر اندازہ ہوا کہ معاملہ کچھ اور ہے۔ سامنے سے ایک لڑکی جس کی عمر شاید بیس سال ہو، پانچ/ چھ چھوٹے بچے، بچیوں کے ساتھ جارہی تھی۔ سب کے کاندھوں پر لٹکے بستوں سے پتا چلتا تھا کہ کہیں ٹیوشن پڑھنے جارہے ہیں۔ ’’آئے ہائے جوانی‘‘ کا نعرہ تو لگتا ہی رہا، مگر جب وہ لڑکی مع اپنی ٹولی کے ان لڑکوں سے آگے نکلی تو ایک لڑکے کی آواز آئی: ’’سلمان! کہاں جارہے ہو؟‘‘ تو اس کے ساتھ کھڑے لڑکے نے کہا: ’’ٹیوشن پڑھنے جارہا ہوں۔‘‘ یہ بالواسطہ ان پر چوٹ تھی۔ میں تب سے سوچ رہا ہوں کہ یہ سب کچھ ایک انسان کو کس قدر ذہنی اذیت کا شکار کرتا ہوگا۔

میری ابتدائی زندگی ایک یکسر مختلف ماحول میں گزری ہے۔ گھر سے باہر کی دنیا کے بارے میں ایک عرصے تک میں زیادہ نہیں جانتا تھا۔ مجھے گھر میں سنجیدہ (اور تھوڑا بہت علمی) ماحول ملا اس لیے میرا مزاج قطعاً دوسروں سے بے حد مختلف رہا۔ مجھے اب تک اس طرح ’’ہوٹنگ‘‘ اور ’’جملے بازی‘‘ کرنا نہیں آتی۔ کبھی کبھی نقصان بھی ہوتا ہے کہ سامنے سے مجھ پر بھی حملہ ہو تو مجھے بروقت جواب نہیں سوجھتے۔ لیکن میں یہ دیکھ کر حیران ہوتا ہے کہ آج کل بچے بھی کیسی کیسی حرکتیں کرنے لگے ہیں اور ان کی سوچ کہاں کہاں پہنچ جاتی ہے۔

جامعہ آنے کے بعد مجھے مزید جاننے کا موقع ملا۔ یہاں آکر میں نے یہ دیکھا کہ جملے بازی صرف لڑکوں تک محدود نہیں ہے۔ جامعہ میں اگر اس میدان کا جائزہ لیا جائے تو لڑکیوں کا پلّہ بھاری نظر آتا ہے۔ آپ نے کچھ ہٹ کے یا عجیب سے کپڑے پہنے ہوں یا آپ کوئی الٹی حرکت کریں، مجال ہے کہ لڑکیاں دیکھ کر جملے نہ کسیں۔

جامعہ کے شعبوں کی راہداریوں میں جابجا طلبہ بیٹھے ملتے ہیں۔ آس پاس کے ماحول سے بے نیاز طلبہ جنہیں اگر کوئی جگہ نہیں ملتی تو وہ وہیں زمین پر دائرہ بناکر بیٹھ جاتے ہیں اور گپ شپ یا پڑھائی میں مگن ہوجاتے ہیں۔ یا جہاں راہداریوں میں بیٹھنے کی جگہ موجود ہے، وہ بھی بھری ہوتی ہے۔ ہوتا کیا ہے کہ وہاں سے جو کوئی گزر رہا ہوتا ہے، اس پر نہ صرف مزے سے تبصرے ہوتے ہیں بل کہ اس پر جملے بھی کسے جاتے ہیں۔ فلاں نے کپڑے کیسے پہنے ہیں، فلاں کے چلنے کا انداز کیسا ہے۔ سب سے زیادہ مزا یوں لیا جاتا ہے کہ جیسے ہی کوئی قریب سے گزرا، ایک آواز لگائی: ’’اوئے!‘‘ جوں ہی اُس نے مڑکر دیکھا تو اپنے برابر والے ساتھی کی طرف مڑ کر کہا: ’’کہاں جارہا ہے؟‘‘ یا کوئی بھی الٹی سیدھی بات۔

اس کے علاوہ جو طلبہ راہداری میں زمین پر یا سیڑھیوں پر بیٹھے ہوتے ہیں، ان کے پاس سے گزرتے ہوئے کہا جاتا ہے کہ آج جمعرات تو نہیں ہے، چونی دے دوں؟ ایک روپیہ دے دو بھئی! شاید جامعہ میں لڑکیاں اپنی اکثریت کا فائدہ اُٹھاتی ہیں :P