Condition of Books in Libraries

جامعہ کراچی بلاشبہ کتب کا خزانہ ہے۔ اگر اس کے کتب خانے کھنگالے جائیں تو بہت سی نایاب کتب مطالعے کے لیے دستیاب ہوتی ہیں۔ ہر شعبے کا ایک کتب خانہ ہے جو عموماً سیمینار لائبریری کہلاتا ہے۔ اس کے علاوہ ایک مرکزی کتب خانہ ’’مرکزی محمود حسین لائبریری‘‘ کے نام سے مشہور ہے۔ اس کی عمارت میں نیچے کتابیں ہفتے/ دو ہفتے کے لیے طلبا کو جاری کی جاتی ہیں (اگر ان کا لائبریری کارڈ بنا ہوا ہو تو)۔ ایک وقت میں دو کتابیں جاری کروائی جاسکتی ہیں۔ یہ جگہ عموماً ’’سرکولیشن‘‘ کے نام سے پکاری جاتی ہے۔ اگر آپ کتب خانے کی لائبریری میں جائیں تو ہر مضمون کا الگ سیکشن ہے اور ہر سیکشن میں بیٹھ کر پڑھنے کی جگہ ہے۔ یہاں سے کتابیں لے جانے کی اجازت نہیں بلکہ ممبرز کو صرف وہیں پڑھنے یا ان کا مواد نقل کرنے کے لیے کتاب جاری ہوتی ہے۔
’’سرکولیشن‘‘ سے اجرا شدہ کتب سے طلبا فائدہ تو اُٹھاتے ہی ہیں لیکن ان قیمتی کتب کے ساتھ جو سلوک کرتے ہیں، اس پر جتنا افسوس کیا جائے کم ہے۔ آج میرے ہاتھ ایک کتاب لگی جس کے ابتدائی صفحات پر لکھی تحاریر پڑھ کر اگرچہ ہنسنا آیا لیکن کتاب کی حالتِ زار اور طلبا کی ذہنی پستی پر شدید افسوس ہوا۔ میں آپ کو اس کتاب کے حال سے آگاہ کرتا ہوں۔
یہ ادریس صدیقی کی ایک ضخیم (غالباً ڈھائی سو سے زاید صفحات پر مشتمل) کتاب ہے۔ عنوان ہے: ’’اردو شاعری کا تنقیدی جائزہ‘‘۔ اس کے نیچے کسی نے قلم سے لکھا ہے: ’’ایسا جائزہ آیندہ ہرگز نہ کرنا ورنہ بہت ماروں گا۔ عبداللہ‘‘ :sad:
اندرونی سرورق سے پہلے دو صفحات کسی زمانے میں خالی ہوا کرتے ہوں گے تاہم اب ان پر کافی کچھ تحریر کیا جاچکا ہے۔ کسی ہمدرد نے ایک پورا صفحہ پند و نصائح سے بھر ڈالا ہے کہ جامعہ میں امن سے رہیں، بڑوں کا ادب کریں، پڑھیں لکھیں، چھوٹوں پر شفقت کریں، وغیرہ وغیرہ۔۔۔ ایک صفحہ پر شروع میں کسی نے قلم سے شاید کوئی کتاب کا نام لکھ ڈالا: ’’اردو شاعری کا ارتقا۔ بشریٰ انصاری۔‘‘ ایک باذوق (یا بدذوق؟) نے بشریٰ انصاری کے قافیے ملائے تو وہ عبارت کچھ یوں ہوگئی: ’’اردو شاعری کا ارتقا۔ بشریٰ انصاری، میں تم پر واری، لے کر رنگا رنگ پروگرام کی سواری، آپ کی خدمت میں پہلی باری، بریانی کباب اور نہاری۔‘‘
حیراں ہوں دل کو روؤں کہ پیٹوں جگر کو میں :dxx:
کتاب کے شروع میں کسی صاحب کا تبصرہ شاملِ اشاعت ہے۔ تبصرے میں کتاب کی خوبیاں اور تعریفیں بیان کی گئی ہیں۔ آخر میں آدھ صفحہ خالی رہ گیا تھا جس پر کوئی صاحب تبصرہ نگار بن کر یوں رقم طراز ہوئے:
’’اب میری اور ادریس (مصنفِ کتاب) کی لڑائی ہوگئی ہے لہٰذا میں اس کتاب کے بارے میں پھر ایک دفعہ کہنا چاہوں گا اور وہ یہ کہ یہ کتاب نہایت بودم ہے، بکواس ہے، طالبِ علم نہ پڑھیں تو بہتر ہے۔ شکریہ فقط۔ علاؤ الدین خالد‘‘
جو ابتدائی صفحات خالی تھے، وہاں ایک محترمہ نے پینسل سے یہ تحریر پیشِ خدمت کی جو کہ دراصل کتاب پر طلبا کے قلمی نقوش کے بارے میں ہے:
’’آج میں نے اس کتاب کی اُوٹ پٹانگ تحریروں کو پڑھا ہے اور مجھے بہت افسوس سے کہنا پڑتا ہے کہ لوگ اگر نصیحت بھی کرنا چاہتے ہیں تو بھی کتاب کا نیست ماردیتے ہیں (جیسا کہ آج میں بھی کررہی ہوں) پینسل سے اسی لیے کررہی ہوں کہ پڑھ کر مٹادیجیے گا۔
عزیز ساتھیو! یہ کتابیں ہمارا سرمایہ ہیں۔ کچھ عقل کے ناخن لیجیے اور اپنے سرمائے کی اپنے خزانے کی مانند حفاظت کیجیے تاکہ آیندہ نسلوں تک ہمارا سرمایہ کام آسکے۔
کتابوں کو کتابوں کی اصل ھالت میں دیکھنے کی مشتاق آپ کی ایک ساتھی
۲۸؍نومبر ۱۹۹۷ء‘‘
اس تحریر پر کسی نے یہ تبصرہ کیا ہے:
’’جی نہیں، ہمارا سرمایہ کتابیں نہیں۔ فخر و غرور سے ڈگری لینے کے بعد نوکری کس کو ملتی ہے۔‘‘
یہ تو ہوا کتاب پر رقم شدہ قلمی نقوش کا مختصر احوال۔ اب کتاب کی حالت سنیے۔ صفحات تو بوسیدہ ہو ہی چکے ہیں۔ ہمیں چاہیے تھا مرزا غالب کی شاعرانہ خصوصیات پر کچھ مواد۔ اب جو فہرست میں سے مرزا غالب کا باب دیکھ کر وہ صفحہ تلاش کرنا چاہا تو علم ہوا کہ صفحہ 140 سے 190 تک تمام صفحات غایب ہیں۔ شاید کسی ضرورت مند نے نکال لیے تھے۔ یہ امر بعید نہیں کہ اسی طرح اور بھی کتنے ہی صفحات کتاب میں سے غایب ہوتے۔ یہ موصوف کا احسان تھا کہ انہوں نے کتاب واپس کرنے کی زحمت گوارا کی۔ شاید انہیں اپنا لائبریری کارڈ عزیز تھا تاکہ وہ دوسری کتابوں کا بھی یہی حال کرسکیں۔
یہ اس ایک کتاب کا حال ہے جو میرے سامنے آج اتفاقاً آئی۔ ایسی کتنی ہی کتب اس وقت اس حالت کا شکار ہوں گی۔ یہ کس کی غلطی ہے؟ کہاں کمی ہے؟ جامعہ میں آنے والے طلبا کو کہتے ہیں کہ اب یہ واقعی بڑے ہوگئے ہیں۔ کیا یہ بڑوں والے کام ہیں؟ بلند و بالا باتیں کی جاتی ہیں، کبھی کتاب کی حرمت پر کوئی درس دیا جاتا ہے؟ :nahi: