میڈم لیٹ لطیف

پرسوں میڈم کی کلاس میں اچھی خاصی کھنچائی ہوگئی۔ سبب یہ بنا کہ پچھلے ہفتے ان کے آنے کا میں نے دس بجے تک انتظار کیا۔ ان کی کلاس کا وقت نو بج کر پچیس منٹ سے دس بج کر پندرہ منٹ تک ہوتا ہے یعنی چالیس منٹ۔ جب موصوفہ نے آنے میں حسبِ عادت دیر کی تو میں نے سوچا کہ کیوں نہ دفتر چلا جاؤں تاکہ کچھ کام ہی نمٹالوں۔ سر امتیاز کی کلاس اس دن ہونی نہیں تھی لہٰذا جب یہ دیکھا کہ میڈم دس بجے تک شعبے میں نہیں آئی ہیں تو مجھ سمیت کچھ طلبہ دس بجے چلے گئے۔ بعد میں پتا چلا کہ میڈم آگئی تھیں اور ان کو کسی خبری نے یہ بھی بتادیا کہ میں موجود تھا۔ اب میری خصوصی کلاس ہونا تو بنتا تھا۔

چناں چہ حاضری لگانے کے بعد مجھے کھڑا ہونے کا حکم ملا اور پوچھا گیا کہ میں اس دن کہاں فرار ہوگیا تھا؟ میں نے مؤدبانہ عرض کی کہ آپ چوں کہ دس بجے تک آئی نہیں تھیں اس لیے میں نے سوچا کہ شاید آج کلاس نہ ہو، شہر کے حالات بھی ٹھیک نہیں ہیں، اس لیے میں چلا گیا تھا۔ کہنے لگیں، میں مانتی ہوں کہ دس بجے تک میں نہیں آئی تھی (اور نہ ہی کبھی آتی ہوں) لیکن کلاس ختم ہونے میں چاہے پانچ منٹ ہی کیوں نہ رہ جائیں، آپ کو رکنا چاہیے کہ شاید میں آجاؤں۔ اوہو۔۔۔ غلطی تو واقعی مجھ سے ہوئی نا جی :P کہنے لگیں کہ اس کا مطلب آپ سب سر امتیاز کی کلاس لینے آتے ہیں، میری کلاس کی کوئی اہمیت نہیں ہے، وہ مجھ سے اچھا پڑھاتے ہوں گے۔ میں نے اتنی آواز میں ’’No Doubt‘‘ کہا جسے صرف میں سن سکا۔ ;-) وہ پوچھنے لگیں کہ اگر آپ سب خود سے یہی سمجھ کر جاتے رہیں گے کہ ٹیچر نہیں آئیں گی تو بتائیں، نصاب کیسے مکمل ہوگا؟ میرا دل تو بہت چاہا کہ انہیں کہوں، اگر آپ روزانہ آدھ گھنٹے تاخیر سے، دس بجے آتی رہیں گی تو نصاب کسی صورت مکمل نہیں ہونے والا۔ لیکن ہمیں اساتذہ کا ادب اس قدر سکھایا جاتا ہے کہ ان کی غلطی کی نشان دہی کرنا بھی مناسب نہیں لگتا۔

آج اپنے کچھ ہم جماعتوں کے سامنے میں نے ایک تجویز رکھی تو وہ اکثریت اسے ماننے کو تیار نظر آئی۔ تجویز یہ تھی کہ آیندہ اگر میڈم دس بجے کے بعد کلاس میں داخل ہوں تو ہم سب کلاس سے باہر چلے جائیں اور اُن سے کہہ دیں کہ سوری میڈم، اگر آپ اتنی دیر سے آئیں گی تو ہم کلاس نہیں لیں گے۔ شاید اسی طرح کچھ فرق پڑجائے۔